Ойрхи дорнодод шашны мөргөлдөөн хурцдаж эхэллээ

2016-01-03 11:13:28

 

Өнгөрөгч нэгдүгээр сарын 2-нд Саудын Арабын вант улс Шейх Нимр ал-Нимрийг бусад 46 хүний хамт терроризмын хэрэгт буруутган цаазалсан байна.  

 

Шейх Нимр ал-Нимр нь 2011 онд Шиа хүмүүсийг гадуурхсан гэх шалтгаанаар Арабын зүүн нутагт засгийн газрын эсрэг бослогыг зохион байгуулсан гол хүмүүсийн нэг юм.

 

Тэрээр хоёр жилийн өмнө баривчлагдсан бөгөөд өнгөрсөн аравдугаар сард түүнд цаазаар авах ял оноожээ.  

 

Цаазлагдсан 47 хүний дунд Чад болон Египетийн нэг нэг иргэн, бусад нь Арабын иргэншилтэй байжээ. Шиа урсгал зонхилдог Иран улс Шейх Нимрийг цаазлах тухай асуудалд Саудын Араб вант улсыг буруушааж байсан юм.   

 

 

Харин Шейх Нимрийг цаазалсны дараа Тегеран дахь Саудын Арабын элчин сайдын яам руу босогчид дайрчээ. Тэд элчин сайдын яаманд гал тавьж, үймээн самуун өдөөсөн бөгөөд одоогоор босогчдын заримыг баривчлаад байгаа аж. Түүнчлэн Саудын Арабын зарим нутагт мөн бослого гарч эхэлсэн байна.

 

Вашингтон Саудын Арабын энэ үйлдлээс болж Ойрхи Дорнод дахь шашны мөргөлдөөнийг хурцатгаж магадгүй боллоо гэжээ.

Дашрамд дурдахад Саудын Араб өнгөрсөн жил 150 хүнийг цаазалсан нь сүүлийн 20 жилийн доторх хамгийн өндөр үзүүлэлт байсан гэж хүний эрхийн чиглэлээр үйл ажиллагаа явуулдаг байгууллагууд мэдэгджээ.

 

Э.Цэнгэл 


Нүүр хуудас